परिचय

 

परिचय

- विकल्प

सायद तिमीले त विर्स्यौ होला मेरो परिचय

हुन त बीच बाटोमा छुट्नेहरूको कहाँ लेखिन्छ र परिचय

पिँधमा परेकाहरूको कहाँ भेटिन्छ र अस्तित्व

म त्यही धोद्रिएको आवाज हुँ

जो हिजो तिमी वुर्जवा सत्ताको विरूद्ध

 चर्का नारा लाउदा लाउदै स्वर फाटेको थियो

म त्यही आन्दोलनमा उद्रिएको स्वीटर हुँ

जसलाई तिमीले गन्तव्यको गाँठो नपारी छाडेर 

फुस्किईरहेछ धागो पटक - पटक

म त्यही वेसुरा बाँसुरी हुँ

जसलाई तिमीले करङमा प्वाल पारेर

मुटु कलेजा थिच्दै गर्धनमा फुकिरहेछौ

र बजाईरहेछौ शान्तिको विगुल

म त्यही उधारो सपना हुँ

जसलाई युध्दमा मरेका आमाहरू आएर

गानिएका थुनको दुध चुसाउछन् 

र दशधाराको मूल्य माग्छन् 

म त्यही बाटो हुँ

जसले तिमीलाई  फेरि फर्केर आउनेछौ भन्ने आशामा 

विकट गाउँ बाट सुगम सहर सम्म पुराएको थियो 

म त्यहि एक थोपा नङको मसी हुँ 

जसले तिमीलाई मालिक बनाउन

आफ्नै भविष्य वाकसमा खसालेको थिएं 

र म हात गोडा भाचिएर

शरिर भरी रगत लतपतिएको लाश हुँ

जसलाई तिमीले लिस्नो बनाएर

पुगेका थियौ सत्ताको सिंहासनमा